مجلة صور واخبار الاسبوعيه رئيس التحرير جعفر الخابوري

أول ما محمد عبدالوهاب رشح الوجه الجديد ليلى مراد علشان تقف قدامه فى فيلم "يحيا الحب" 1938.. اعترض المخرج محمد كريم وقاله "متنفعش يا محمد"..

وكان اعتراض كريم راجع لسببين .. الأول إنها نحيفة زيادة عن اللزوم ومش باين عليها أي ملامح أنثوية رغم إن عمرها كان 20 سنة .. أما السبب التانى فكان خجلها الشديد..

فى الوقت ده اتمسك عبدالوهاب بليلى وقال هى اللى هتعمل الفيلم.. فكريم قاله خلاص براحتك بس أنا قلت لك متنفعش..

وفى أول التصوير وبما إنه مش مقتنع بيها .. حصلت مشاكل كتير بين كريم وليلى .. وبقت ليلى تفوت وتعدى.. لحد ما بدأت تخلص جدا للتجربة وهنا بدأت العلاقة تتحسن شوية بشوية.. لحد ما جات يوم ووقعت ليلى من طولها فى اللوكيشن.. ووقتها عرف كريم من أختها إن ليلى مش بتاكل من كتر تفكيرها فى الدور.. وقالت له "ممكن تقعد يومين متاكلش".. وهنا أصدر كريم فرمان من بندين.. الأول إن ليلى مراد لازم تتغدي قدامه فى اللوكيشن كل يوم.. أما البند التاني فهو أن الغدا يكون لحوم وفراخ وحمام ومحاشي وطواجن والذى منه..
المخرج الحنين رزق..
#الحكواتي_الهامي_سمير
#الهامي_سمير