صحيفة نبض الشعب الاسبوعيه رئيس التحرير جعفر الخابوري

اجمل الحوارات اللي بتصف البيروقراطية في المصالح

- ايه حكايه الملف ده .يا عويجة افندي ..!؟؟؟؟
= حكايه مهمه اوى يا فندم , اموال كانت هضيع على الشركه اموال صرفت بدون وجه حق .
- عفارم عليك يا عويجه افندى عفارم , ايه حكايه الاموال ديه .
= من 18 سنه يا فندم و بالتحديد فى تاريخ 4-4 سنه 1950 صرفت الشركه للمقاول اللى بنى المكاتب الجديده مبلغ 88 الف و 999 جنيه و 444 مليم حسب العقد المبرم .
- عظيم .
= و بعدين اكتشفت انا ان فى شباك اوضتى شنكل ناقص , ارسلت خطاب مسُجل مستعجل بعلم الوصول للمقاول اللى بنى الشركه فرد على الشركه بانه سلم المبنى حسب المواصفات و بذلك يكون غير مسئول عن الشنكل اللى ناقص .
- عنده حق
= صبرك بالله بس يا فندم , انا طلبت من اللجنه اللى استلمت المبانى مراجعه كشوف الاستلام
- و عملت اييه اللجنه
= عملت لجنه
- اللجنه عملت لجنه !! ؟
= ايوه يا فندم , لجنه فرعيه
- لجنه فرعيه علشان ايه
= علشان تشوف اذا كان فيه خروم مكان الشنكل , يبقى الشنكل كان راكب و فقد و اذا لم يكن هناك خروم فيبقى المقاول مركبش الشنكل
- و لقو الخروم ؟
= لا يا فندم , في الحقيقه اعضاء اللجنه اختلفو نصهم قال ان ديه خروم الشنكل و النص التانى اجمع على ان ديه بيوت حرامى الحله
- حرامى الحله !! ؟
= ايوه يا فندم
- هنا فى الشركه
= ايوه يا فندم هنا فى الشركه
- و مسكتو الحرامى
= لا يا فندم , ده نمل اسمه حرامى الحله
- المهم اللجنه الفرعيه عملت ايه
= عملت لجنه
- رخره ؟
= ايوه يا فندم , لجنه داخليه و ثبت لها بعد الفحص ان الخروم ليست خروم شنكل و انما خدوش تكونت بمعرفه قطه
- قطه !!
= ايوه يا فندم قطه , لذلك قد قام الدليل على ان المقاول لن يركب الشنقل
- شنقل ؟ قصدك شنكل
= اه يا فندم شنكل و بذلك تقاضى ثمن الشنكل و قدره 44 مليم بدون وجه حق
- 44 مليم !! ؟ ده اجرااااام
= هوا انا سبته , ارسلتله صوره من تقرير اللجنه الرئيسيه و صوره من تقرير اللجنه الفرعيه و صوره من تقرير اللجنه الداخليه و طالبناه رسميا بخطاب مسجل مستعجل موصى عليه بعلم الوصول بتركيب الشنكل او توريد ثمنه لخزيه الشركه
- اللى هما ال 44 مليم
= ايوه يا فندم ال 44 مليم
- و دفعهم
= لا رفص
- اخص و بعدين
= مسبتوش بعتله خطاب مسجل مستعجل بعلم الوصول يا الدفع يا يركب الشنكل , مردش مسبتوش بعتله انذار على يد محضر
- مردش
= لا رد و قال مش دافع , مسبتوش كتبت مذكره لقلم قضايا الشركه برفع دعوه على المقاول و اتاجلت القضيه 14 مره لغايت سنه 1961
- ها و بعدين
= المقاول وضع تحت الحراسه
- عال يبقى اتحلت
= طالبنا الحارس , رفض الدفع
- مسبتووووش
= لا سبته و رجعت طالبت المقاول
- و المقاول يدفع منين ما دام تحت الحراسه
= ما شاء الله يا فندم على ذكاء ساعدتك , هوا رد علينا كدا بالظبط سبته و طالبت الحارس , الحارس رد علينا و قال ان ديه مسئوليه اللجنه اللى استلمت المبانى
- طالبت اللجنه طبعا
= طبعا , و رئيس اللجنه قال ان ديه مسئوليه اللجنه الفرعيه
- بتاعت حرامى الحله
= هيا بعينها , اتضح ان رئيس اللجنه انتدب للعمل فى الكويت , مسبتوش , بعتنا للكويت علشان نحصل منه المبلغ المذكور
- مبلغ ال 44 مليم
= تمام يا فندم
رد رئيس اللجنه الفرعيه و قال ان هوا مش مسئول و المسئول رئيس اللجنه الداخليه
- بتاعت القطه
= تمام يا فندم , بعتناله لقيناه
- اتنقل استراليا
= لا يا فندم , لقيناه اتنقل للدار الاخره توفى اللى رحمت الله
- مسبتوش
= لا يا فندم سبته
- و مسكت فى القطه
= لا يا فندم , مسكنا فى الورثه
- طالبته الورثه كمان
= امال يا فندم احنا بنلعب
ردو و قالو ان المرحوم كان مسرف و متلف و مبزر و متلاف و سفيه و مسبلهمش غير الديون
- طالبته الديانه
= فى الحقيقه يا فندم
- حقيقه ايه , انتو سبته حد ماطلبتهوووش ده انتو ناقص تطالبو الجيران
= والله يا فندم انا جاى اعرض على سيادتك الموضوع لأخذ الرأى , فاذا أمرت سيادتك ان احنا نطالب الجيران نطالبهم مفيش حاجه
- قولى يا عويجه افندى الدوسيه ده فيه كام مُكاتبه .
= كتير يا فندم حوالى ألف مُكاتبه .
- ألف مُكاتبه , و كل مُكاتبه عليها كام امضه .
= فى المتوسط 6 امضائات يا فندم يعنى حوالى 6 الاف امضاء .
- اه 6 الاف امضاء و كل مُكاتبه خاديتلها ساعتين شغل .
= قول تلاته يا فندم .
- ثلاااثه يبقى 3 الاف ساعه و متوسط ساعات العمل فى اليوم 6 ساعات يعنى 500 يوم .
= شوفت يا فندم بنتعب قد ايه .
- الف مُكاتبه يا عويجه افندى فى 6 ألاف امضه بـ 500 يوم عمل علشان تحصل 44 مليم .
= امال يا فندم , اموال الشركه ديه امانه فى عنقى مقدرش افرط فيها اللوايح كدا القانون بيقول كدا .
- اسمع يا عويجه افندى القانون اللى يقول انك تصرف 400 جنيه علشان تحصل 44 مليم ده قانون حماار .

فؤاد المهندس - حسن مصطفى
فيلم أرض النفاق 1968